এন পি পিত যোগদান প্ৰাক্তন মন্ত্ৰী ভৱেন বৰুৱা, অভিনেতা ব্ৰজেন বৰাৰ

0
27


অগপ-বিজেপিৰ মিত্ৰতাৰ পাছতেই আঞ্চলিক দলটোৰ নেতা-কৰ্মীৰ মাজত বৃদ্ধি পাইছে অসন্তুষ্টি। দলৰ নেতৃত্বই নাগৰিকত্ব সংশোধনী বিধেয়কৰ পোষকতা কৰা বিজেপিৰ সৈতে পুনৰ মিত্ৰতাত আৱদ্ধ হোৱাৰ পাছত এজনৰ পাছত আনজন নেতাই অগপ ত্যাগ কৰিছে।

বৃহস্পতিবাৰে অসম গণ পৰিষদ ত্যাগ কৰি নেশ্যনেল পিপল’চ পাৰ্টিত যোগদান কৰে অগপৰ এসময়ৰ মন্ত্ৰী তথা দলটোৰ জ্যেষ্ঠ নেতা ভৱেন বৰুৱাই। এন পি পিৰ গুৱাহাটীৰ কাৰ্যালয়ত দলটোত যোগ দিয়ে জাতীয়তাবাদী নেতাগৰাকীয়ে।

অগপ এৰাৰ পাছতেই নাগৰিকত্ব সংশোধনী বিধেয়কৰ বিৰোধিতা কৰি বিজেপিৰ সংগ ত্যাগ কৰা অগপই দুমাহৰ পাছতেই পুনৰ গেৰুৱা দলটোৰ কাষ চাপি যোৱা কাৰ্যক কঠোৰ ভাষাৰে সমালোচনা কৰে ভৱেন বৰুৱাই।

তেওঁ কয়, ‘’অগপ-বিজেপিৰ এই মিত্ৰতা প্ৰতাৰণামূলক। অগপ নেতৃত্বই অসমৰ ৰাইজৰ লগতে দলৰ তৃণমূল কৰ্মীসকলক বিশ্বাসঘাতকতা কৰিছে।‘’

তেওঁ লগতে অচিৰেই বহু অগপ-কৰ্মীয়ে দলত্যাগ কৰি এন পি পিত যোগ দিব বুলিও মন্তব্য কৰে।

একেদৰে অগপ এৰি আজি এন পি পিত যোগ দিলে দলটোৰ কেন্দ্ৰীয় কাৰ্যনিৰ্বাহকৰ সদস্য তথা ডিব্ৰুগড় জিলা সমিতিৰ তিনিবাৰৰ সাধাৰণ সম্পাদক শশাংক নেওগেও। তেঁৱো অগপ নেতৃত্বৰ শেহতীয়া স্থিতিৰ বিৰুদ্ধে ক্ষোভ প্ৰকাশ কৰে।

বৃহস্পতিবাৰৰ এই যোগদান অনুষ্ঠানতেই এন পি পিলৈ আহে বিশিষ্ট অভিনেতা ব্ৰজেন বৰাও। অসম আন্দোলনৰ সক্ৰিয় নেতা তথা বিজেপিতো কিছুদিন সদস্য হিচাপে থকা অভিনেতাগৰাকীয়ে সাম্প্ৰতিক প্ৰেক্ষাপটত উত্তৰ-পূবৰ খিলঞ্জীয়া মানুহক অস্তিত্বৰ সংকটৰ পৰা উদ্ধাৰৰ বাবে সকলোকে আগবাঢ়ি আহিবলৈ আহ্বান জনায়।

উল্লেখ্য যে, অগপ-বিজেপিৰ মিত্ৰতাৰ পাছতেই ইতিমধ্যে আঞ্চলিক দলটোৰ পৰা ওলাই আহিছে লাচিত বৰদলৈকে ধৰি কেইবাজনো নেতা কৰ্মীয়ে।



Source link

[Total: 0    Average: 0/5]

LEAVE A REPLY

Please enter your comment!
Please enter your name here