নাগৰিকত্ব বিধেয়ক গৃহীত হ’লে চুবুৰীয়া ৰাষ্ট্ৰত উৎপীড়নৰ সন্মুখীন হ’ব হিন্দুসকল : দেৱব্ৰত শইকীয়া

0
23


প্ৰধান মন্ত্ৰী নৰেন্দ্ৰ মোদীৰ লগতে বিজেপি দলৰ ‘হিন্দুত্ব প্ৰীতি’ প্ৰতি প্ৰশ্ন তুলিছে অসম বিধান সভাৰ বিৰোধী দলপতি দেৱব্ৰত শইকীয়াই। শইকীয়াৰ মতে বিজেপিয়ে এই বিধেয়কৰ জৰিয়তে হিন্দুসকলক সংকটৰ মুখলৈহে ঠেলি দিব বিচাৰিছে।

সোমবাৰে বিধানসভাৰ কংগ্ৰেছ বিধায়িনী কক্ষত আয়োজিত এখন সংবাদমেলত দলপতি গৰাকীয়ে মোদীক ‘হিন্দু বিৰোধী’ বুলিহে আখ্যা দি কয়, ‘এই বিধেয়কখন গৃহীত কৰাৰ পাছত ভাৰতৰ কাষৰীয়া ৰাষ্ট্ৰসমূহৰ সংখ্যালঘু হিন্দু সকলৰ জীৱন, সা-সম্পত্তিৰ প্ৰতি ভাবুকি অহাৰ সম্পূৰ্ণ সম্ভাৱনা আছে। কাৰণ কাষৰীয়া ৰাষ্ট্ৰৰ সংখ্যালঘু সকলক ভাৰতে নাগৰিকত্ব প্ৰদান কৰিলে সেই ৰাষ্ট্ৰ সমূহৰ ধৰ্মীয় মৌলবাদী সকলে সংখ্যালঘু সকলক ভাৰতলৈ আহিবলৈ বাধ্য কৰাব।‘

মোদী নেতৃত্বাধীন বিজেপি চৰকাৰৰ নীতিৰ বাবেই আন ৰাষ্ট্ৰত শান্তিত থকা হিন্দুসকল উৎপীড়নৰ সন্মুখীন হ’ব পাৰে বুলিও শইকীয়াই মন্তব্য কৰে।

একেদৰে ‘অসম চুক্তি’ৰ ৬ নং দফা ৰূপায়ণৰ বাবে গঠন কৰা উচ্চস্তৰীয় সমিতিৰ কেইবাজনো সদস্যই পদত্যাগ কৰাৰ পাছতো চৰকাৰে এই সমিতিখনৰ বিজ্ঞাপন দি ৰাইজক বিভ্ৰান্ত কৰিব বিচাৰিছে বুলিও তেওঁ কয়।

৬ জনগোষ্ঠীৰ জনজাতিকৰণৰ বাবেও কমিতিৰ ওপৰত কমিতি গঠন হৈছে বুলি তেওঁ মন্তব্য কৰি চৰকাৰে ইয়াৰ যিধৰণে সমিধান দিব লাগে দিয়া নাই বুলিও তেওঁ উল্লেখ কৰে।

একেখন সংবাদমেলতে যোৱা ৯ ফেব্ৰুৱাৰিত প্ৰধান মন্ত্ৰী নৰেন্দ্ৰ মোদীয়ে অসমত আধাৰশিলা স্থাপন কৰা প্ৰকল্প সমূহৰ প্ৰসংগ আনি শইকীয়াই কয় যে পূৰ্বৰ কংগ্ৰেছ চৰকাৰৰ দিনত বাজেটত পুঁজি নিৰ্ধাৰণ হোৱা বিভিন্ন প্ৰকল্প এতিয়াৰ বিজেপি চৰকাৰে ৰূপায়ণ কৰা নাই।

ইয়াৰ উদাহৰণ স্বৰূপে নিউ বঙাইগাঁওৰ পৰা আজ্ঞাঠুৰিলৈ হ’বলগীয়া দ্বৈত ৰেলপথৰ কথা তেওঁ উল্লেখ কৰে। ‘কংগ্ৰেছে ইয়াৰ কৃতিত্ব পাব বুলিয়েই বিজেপিয়ে এই কাম আগবঢ়োৱা নাই আৰু অসমৰ ৰেলযাত্ৰীক জীয়াতু ভূগাইছে’, দেৱব্ৰত শইকীয়াই কয়।

আনকি বিজেপি চৰকাৰেই ঘোষণা কৰা উত্তৰ-পূৱত বিমান সেৱা সম্প্ৰসাৰণো এতিয়া কাৰ্যক্ষেত্ৰত একোৱেই নহ’ল বুলি শইকীয়াই দাবী কৰে। কেন্দ্ৰীয় মন্ত্ৰী নিতিন গাডকাৰীয়ে অসমৰ বাবে ঘোষণা কৰা ‘পথ প্ৰকল্প’ৰ কামো একো আগনাবাঢ়িল বুলিও তেওঁ মন্তব্য কৰে।

একেদৰে ৰাজ্যত চলি থকা চিণ্ডিকেট আৰু দূৰ্নীতিৰ তদন্তৰ প্ৰতিবেদনো বিধান সভাত এতিয়ালৈ দাখিল নোহোৱা বিষয়টোতো দেৱব্ৰত শইকীয়াই অসন্তুষ্টি প্ৰকাশ কৰে।



Source link

[Total: 0    Average: 0/5]

LEAVE A REPLY

Please enter your comment!
Please enter your name here