পূজা মণ্ডপত বাগদেৱীৰ বন্দনাৰ ঠাই ল’লে নাগৰিকত্ব বিধেয়কৰ প্ৰতিবাদৰ ভাষাই

0
30


সৰস্বতী পূজা উপলক্ষে বাগদেৱীক আৰাধনাৰ মাজত কটন বিশ্ববিদ্যালয় আৰু গুৱাহাটী বিশ্ববিদ্যালয়ৰ ছাত্ৰ সমাজে তল পৰিবলৈ নিদিলে অসমীয়া জাতিৰ অস্তিত্বৰ সংকট নমাই আনিব খোজা নাগৰিকত্ব সংশোধনী বিধেয়কৰ বিৰুদ্ধে থকা তেওঁলোকৰ প্ৰতিবাদৰ কণ্ঠক।

দুয়োখন বিশ্ব বিদ্যালয়ৰে ছাত্ৰ-ছাত্ৰীসকলে পুৱাৰ পৰাই আহি বাগদেৱীৰ আশীৰ্বাদ লোৱাৰ সমান্তৰালকৈ জাতিধ্বংসী বিধেয়কখন ৰাজ্যসভাত গৃহীত নহ’বৰ বাবে দেৱী সৰস্বতীৰ শ্ৰীচৰণত সেৱা-প্ৰাৰ্থনা জনায়।

বিধেয়কখনৰ বিৰুদ্ধে ছাত্ৰ সমাজৰ নিৰন্তৰ প্ৰতিবাদৰ চানেকি বহন কৰি কটন বিশ্ব বিদ্যালয়ৰ পূজা-মণ্ডপৰ সনমুখত লাগি থকা দেখা গ’ল ‘we oppose Citizenship Amendment Bill-2016’ লিখি ৰখা ফলক।

কটন বিশ্ব বিদ্যালয়ৰ ছাত্ৰ একতা সভাৰ সাধাৰণ সম্পাদকে নৰ্থ ইষ্ট নাওৰ আগত কয় যে কালি মোদীয়ে চাংসাৰিত নাগৰিকত্ব সংশোধনী বিধেয়কখন গৃহীত হ’বই বুলি কৰা মন্তব্যক প্ৰত্যাহ্বান জনাই এনেদৰে পূজাৰ দিনটোতো প্ৰতিবাদ সাব্যস্ত কৰা হৈছে। কেন্দ্ৰীয় চৰকাৰে এই বিধেয়কখনৰ জৰিয়তে অসম আৰু অসমীয়াৰ প্ৰতি ভাবুকি নমাই আনিছে বুলিও সাধাৰণ সম্পাদকজনে মন্তব্য কৰে।

আনহাতে, গুৱাহাটী বিশ্ববিদ্যালয়তো একেই পৰিবেশে বিৰাজ কৰিলে। বিশ্ববিদ্যালখনতো দেবীক পূজা-অৰ্চনাৰ সমান্তৰালকৈ বিধেয়কৰ বিৰুদ্ধে আৰ চি চি-২ বয়জ হোষ্টেলৰ আৱাসী ছাত্ৰ-ছাত্ৰীয়ে চিত্ৰৰ মাধ্যমেৰে সাব্যস্ত কৰে অভিনৱ প্ৰতিবাদ।

এখন ক’লা কাপোৰত ডাঙৰকৈ উত্তৰ-পূৰ্বাঞ্চলৰ মানচিত্ৰ অংকন কৰি ‘জয় আই অসম’ লিখি ৰখাৰ লগতে উত্তৰ-পূূবৰ ৮খন ৰাজ্যৰ ৰাজ্যিক ভাষাত ‘নাগৰিকত্ব সংশোধনী বিধেয়ক ২০১৬-অৰ বিৰোধিতা কৰো’ বুলি পোষ্টাৰ লগায় পূজাস্থলীত।

প্ৰসংগক্ৰমে উল্লেখ কৰিব পাৰি যে ইয়াৰ পূৰ্বেও অসমীয়াৰ বাপতি সাহোন ভোগালী বিহুত, সদ্য সমাপ্ত অসম সাহিত্য সভা আৰু শ্ৰীমন্ত শংকৰদেৱ সংঘৰ অধিবেশন আৰু অন্যান্য অনুষ্ঠানৰ সময়তো নাগৰিকত্ব সংশোধনী বিধেয়কখনৰ বিৰুদ্ধে অসমৰ জনগণে নিৰন্তৰ আৰু দ্ব্যৰ্থহীন প্ৰতিবাদ সাব্যস্ত কৰি আহিছে।



Source link

[Total: 0    Average: 0/5]

LEAVE A REPLY

Please enter your comment!
Please enter your name here